طريقة عمل جبنة كاسات بالفلفل والطماطم

اسعار الجبن فى ارتفاع متواصل – عشان كدة عندى لكم طريقة جميلة لعمل جبنة موفرة جداً وطعمها تحفة بجد

اليكم طريقة سهلة جدا لتحضير جبنة كاسات للفرد فى السندوتشات – وكمان لو عاملين ريجيم حتبقى حلوة قوى لما نغمس فيها الخس او الجرجير

المكونات

  • نصف كيلو جبنة اسطمبولى ناشفة (لا تشتريها اذا كانت طرية) – او ربع كيلو جبنة شيدر مبشورة – او خليط شيدر ورومى مبشورين
  • ربع كيلو حليب
  • ربع كيلو زيت (دوار شمس مثلا ونتأكد ان مذاق الزيت طازج وطيب قبل استخدامه)
  • قرن فلفل حامى (اختيارى)
  • ربع كيلو فلفل رومى
  • نصف كيلو طماطم

الطريقة

  • نفرم الفلفل الحامى والرومى فرم خشن فى الكبة (نبضات)
  • نقطع الطماطم فتفافيت صغيرة بالسكينة
  • نسخن الحليب على نار هادية
  •  نضع الجبنة فى الخلاط مع الزيت والحليب الساخن ونضربهم فى الخلاط ضرب مبرح على أعلى سرعة لمدة 3 دقائق على الأقل
  • نصب الخليط فى برطمان زجاجى او علبة بلاستيك ونقلب معاه الفلفل والطماطم ونضعهم فى الثلاجة
  • فى اليوم التالى حيبقى متماسك أكتر وتقيل عن اليوم الاول
  • نفرده بالمعلقة لعمل السندوتشات – او نغمس فيه اوراق خس او جرجير – او نرش منه على اطباق السلطة الخضراء مع حلقات زيتون لتعطى طعم السلطة اليونانى الرائعة

الطريقة دى موفرة جدا – فباستخدام تلك الالة الحاسبة نجد أن الكيلو من الجبنة الطرية البراميلى يقف ب15ج و43 قرش فقط – قد يزيد او يقل حسب سعر شرائك للمكونات طبعا – ويمكنك استخدام تلك الالة الحاسبة بنفسك لمعرفة ما تكلفته بالضبط

دة غير ان الجبنة الطرية بتقعد اكثر بكتير ومش بتخلص بسرعة زى أى جبنة عادية – وطبعا ممكن تضاعفوا المقادير بنفس النسب

وبالف هنا وشفا

شفت مفاجأة النهاردة ؟ اضغط هنا عشان تشوفها (مفاجأة جديدة كل يوم)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *