طريقة تجهيز بطاطس محمرة مجمدة فى البيت

بطاطس فارم فريتس بقت غالية جداً وسعرها مبالغ فيه – ايه رايكم نعمل أحلى منها فى البيت – احلى بكتيييير جدا كمان

الطريقة دى لها فوائد متعددة :

  • حنحفظ البطاطس فى الفريزر بحيث تبقى جاهزة فى أى وقت لا تأخذ سوى 5 دقائق وتبقى على السفرة
  • حنقدر نستهلكها فى الصيف ونتجنب شراء البطاطس الخزين اللى بتتباع فى غير اوانها واللى بيرشوها بمواد كيماوية ضارة بالصحة
  • طريقة موفرة جداً مقارنة بفارم فرتس او أى ماركة بطاطس سابقة الطهى

أنسب وقت لتجهيز البطاطس وتجميدها لما تكون البطاطس فى أوانها – يجب الابتعاد تماماً عن بطاطس الثلاجات لانها بتكون مرشوشة بمواد ضارة – نشترى بس البطاطس الجديدة اللى بتكون بطينتها – والافصل كمان اننا نشترى البطاطس الرملى اللى بتتزرع فى الرمل وبنعرفها من شكلها – بتكون نظيفة بدون طينة وحنلاقى على قشرتها ذرات رمل – دى أنظف حاجة لانها بتبقى بطاطس ناشفة ونظيفة وليس بها أى روائح كيماوية وقلبها بيبقى زى الفل بعكس البطاطس الطينى ساعات بتبقى بداخلها لون اسود ونضطر نرميها

طبعا عند الشراء نختار بطاطس ناشفة وقشرتها ملساء وخالية من الثقوب والاجزاء الغامقة – اما اذا كانت طرية او القشرة مكرمشة او منبتة او ظهرت عليها درنات تبقى غير طازجة وأخذت رطوبة فنتجنب شراءها

الطريقة التالية نتاج تجارب كتير قمت بيها للتوصل الى التوقيت المناسب لسلق البطاطس – بحيث تصبح طرية لكن متماسكة لا تتقطع او تتهرى

المقادير

  • أى كمية بطاطس – من كيلو الى 7 او اكثر
  • 3 لتر ماء
  • 90جم ملح
  • 150جم خل
  • لتر زيت عند التحمير

الأدوات

  • حلة كبيرة 6 لتر + شبكة او مصفة معدن بمقاس مناسب يمكننا انزالها داخل الحلة الكبيرة (او الحلة المزدوجة بتاعة سلق المكرونة)
  • حلة متوسطة 3 لتر لتبريد البطاطس فى الماء
  • موبايل لاستخدامه تايمر

الطريقة

نضع 3 لتر ماء فى حلة كبيرة على النار ونضيف للماء الملح والخل ونترك الحلة مغطاه على النار

  • نغسل البطاطس كويس ونقشرها – او نتركها بقشرها لو بطاطس رملى (قشرتها خفيفة ونظيفة – وبرضه نغسلها كويس جداً) ثم نقطعها صوابع وننقعها فى  وعاء ماء بارد من الحنفية
  • نضع مقدار كيلو واحد من صوابع البطاطس فى شبكة او مصفة حجمها مناسب للحلة بحيث ينفع تتزل فيها
  • بعد ما الحلة تغلى كويس نسقط  المصفة او الشبكة بالبطاطس فى الماء المغلى ونغطى الحلة
  • نجهز حلة أخرى نضع فيها ماء بارد من الحنفية
  • ونجهز صفاية فى الحوض
  • نراقب الماء وعندما يبدأ فى الغليان مرة أخرى (بعد حوالى 3 دقائق لكيلو بطاطس) نبدأ نحسب دقيقة واحدة بالضبط من بدء الغليان – انا باضبط تايمر الموبايل
  • بمجرد ما التايمر يرن نرفع شبكة البطاطس من الماء المغلى ونسقط صوابع البطاطس فى حلة الماء البارد
  • اذا وجدنا شوية صوابع لسة فى الماء المغلى سقطوا فيها من الشبكة نرفعهم بصفاية صغيرة ونحطهم مع اصحابهم فى الماء البارد ونغطى حلة الماء المغلى على النار
  • اذا كنا عاملين أكثر من كيلو نملأ الشبكة بكمية أخرى (كيلو بالكتير او اقل فى كل مرة) ولما نفس الماء يرجع يغلى كويس نسقط الشبكة فيه ونكرر نفس الخطوات حتى ننتهى من سلق كل البطاطس
  • لو عاملين اكثر من 3 كيلو نحط معلقة صغيرة ملح فى حلة الماء المغلى بعد كل 3 كيلو لان البطاطس بتشرب من الملح وبالتالى بيقل تركيزه فى الماء المغلى
  • نفرد البطاطس فى شبكة او مصفاة لتصفية الماء حوالى ساعة – او لو عايزين نكمل بكرة نحط صفاية البطاطس وتحتها طبق فى الثلاجة ونغطيها لليوم التالى

الخطوة الثانية: التحمير

  • عند الرغبة فى تناول بطاطس محمرة نسخن زيت غزير فى طاسة عميقة تسخين عالى جداً (190 درجة مئوية)
  • نخرج كيس من الفريزر نقسمه على مراحل فى كل مرة نضع كمية قليلة منه فى الزيت (بطاطس لا تزيد عن نصف وزن الزيت) حتى لا يبرد ولا يأخذ وقت فى التحمير
  • خلال من 5 الى 8 دقائق سيصبح لون البطاطس ذهبى جميل – نخرجها فى صفاية – لن تأخذ وقت لانها سابقة الطهى

البطاطس بالطريقة دى أحلى من فارم فريتس – تشبه طعم french fries بتاعة مكدونالدز – مقرمشة من الخارج طرية وبيضاء كالقشطة من الداخل

على فكرة فى الطريقة دى البطاطس بتبقى خفيفة جدا ومش شاربة زيت من الداخل – ولو بردت مش بتجلد زى البطاطس المحمرة التقليدية – بتفضل طرية حتى لو باتت – لذلك فهى مناسبة جداً للخروجات وللسندوتشات

مقدار الزيت المستهلك بالطريقة دى = 50 جرام زيت لكل كيلو جرام بطاطس سابقة السلق (نفس نسبة استهلاك الزيت عند التحمير بالطريقة العادية)

الف هنا وشفا وتحت أمركوا فى اى استفسارات


المراجع:

http://www.cookingissues.com/index.html%3Fp=4043.html

http://www.bbc.com/future/story/20150407-the-science-of-the-perfect-chip

http://www.dailymail.co.uk/news/article-2220876/How-McDonalds-makes-fries-Video-reveals-secrets-popular-potato-strips-fast-food-joint.html

https://en.wikipedia.org/wiki/Triple_Cooked_Chips

http://www.manarasoft.com/blog/?p=1

http://www.cairodar.com/379581/%D8%B7%D8%B1%D9%8A%D9%82%D8%A9-%D8%B9%D9%85%D9%84-%D8%A8%D8%B7%D8%A7%D8%B7%D8%B3-%D9%81%D8%A7%D8%B1%D9%85-%D9%81%D8%B1%D9%8A%D8%AA%D8%B3-%D9%81%D9%8A-%D8%A7%D9%84%D9%85%D9%86%D8%B2%D9%84

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *