احلى كفتة حاتى على البوتاجاز

مين مبيحبش كفتة الحاتى بطعمها اللى بيخدر وياخد الواحد فى حتة تانية خالص !

المشكلة ان الكبابجية بقت اسعارهم نار يا حبيبى نار – ولو الميزانية مخرمة معاك يبقى عشان تشبع غرائزك فى لهط صوابع كفتة الحاتى الساخنة اللذيذة امامك حل من اتنين : اما انك تفكر جدياً فى التبرع باحد اعضاءك لتمويل عملية شراء الكفتة من معالى الباشا الحاتى او – لو اعضاءك غالية عليك يبقى البديل هو انك تتبع طريقتى المتواضعة التى ستقرأها جنابك فى الصفحة التالية :

المقادير

  • نصف كيلو لحم مفروم بالدسم (النوع الرخيص – 40% دسم  – الغالى ابو لحمة حمرا والجو دة مش حتطلع الكفتة حلوة)
  • بصلة متوسطة
  • 2 بيضة بلدى
  • معلقة صغيرة ملح صينى MSG
  • معلقة صغيرة ملح
  • معلقة صغيرة فلفل اسود
  • ربع معلقة صغيرة كبابة صينى
  • ذرة روزمارى مطحون
  • 2 معلقة كبيرة خل

الطريقة

  • نضرب البصل فى الكبة مع البيض والخل والتوابل
  • نصب الخليط على اللحمة المفرومة فى طبق كبير ونعجنهم مع بعض بايدينا كويس قوى لغاية ما يتجانس الكل وتمتص اللحمة كل السوائل
  • نترك طبق اللحم فى الثلاجة بضع ساعات بدون غطاء ليتماسك
  • نسخن شواية حديد على البوتاجاز – او طاسة الومنيوم – ناشفة بدون زيت
  • نشكل الكفتة ونبططها باقل سمك ممكن فى راحة ايدنا – بشكل بيضاوى طويل او مستدير زى ما نحب
  • نضع الكفتة على السطح الساخن 3 دقائق ولما القعر ياخد لسعة الشوى واللون الذهبى الجميل نقلبها على الوجه الاخر مع تقليل النار لمدة 5 دقائق او حتى يستوى ويحمر

ملحوظة : عند تقديم الكفتة دى راعى ان الناس تكون قاعدة ومثبتة نفسها فى الكراسى كويس – حصل قبل كدة ناس كلت الكفتة دى وعملت حاجات غريبة (لو شفت فيلم سبايدرمان حتفهم قصدى) – لذلك لزم التنويه

والف هنا وشفا

شفت مفاجأة النهاردة ؟ اضغط هنا عشان تشوفها (مفاجأة جديدة كل يوم)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *