حل مشكلة توقف سخان الغاز عن التسخين

عندى سخان غاز ايديال 10 لتر – فى الاول البطاريات بتاعته عاشت حوالى سنتين وبعد كدة بقينا كل شوية نجيب بطاريات طورش جديدة لكن السخان مش بينزل ماء ساخن الا بطلوع الروح وبعد مخاولات كتير لفتح وقفل الحنفية الساخنة – صوت التكتكة موجود لكن الماء بارد والسخان مش راضى يولع – كنت فاكر السبب من ضعف البطاريات واشترينا كتير – وفى الاخر طلبت صيانة اوليمبيك تليفون 19999 وجاء المندوب بعد يومين فى الميعاد المحدد – واتضح ان المشكلة كانت بسيطة جدا لم تأخد منه سوى 5 دقائق – لاحظته وعرفت الطريقة فقلت اكتبهالكو هنا يمكن حد يستفيد ويصلحه بنفسه ويوفر فلوسه

اولا فك وش السخان سهلة جدا – بعض الناس فاكرة اننا لازم نطلب شركة الغاز – لكن دة مش صحيح – لان وش السخان بيتفك بسهولة من غير ما نحتاج نشيله من على الحائط – مجرد مسمارين من تحت ومسمارين من فوق – حيطلع وش السخان معاك على طول وحتشوف كل مكوناته امامك بوضوح وهو راكب على الحيطة كما هو

توجد علبة صغيرة – اصغر من نصف كف الايد – موجودة فوق ماسورة الغاز اللى جاية من تحت السخان – بيسموها “سولينويد” solenoid – هى عبارة عن علبة صغيرة مفتوحة من الجنبين

فك العلبة من السخان – هى مربوطة بمسمارين واحد تحت على يمين العلبة والتانى فوق على شمالها – وفك ال 2 سوكيت اللى موصلين السلوك عشان تعرف تخرجها من مكانها

لما تخرج العلبة من مكانها حتلاقيها من غير جناب وبداخلها حتشوف اسطوانة سوداء اللون تملأ العلبة – نظفها بفرشة اسنان قديمة لان حتلاقى عليها تراب كتير – وفى ظهر العلبة يوجد مكبس او عمود معدن قصير حواليه سوسته وفى آخر العمود كاوتشة سوداء – لو ضغطت بصباعك على الكاوتشة دى المكبس حيدخل ويخرج بفعل السوستة – كرر الضغط عليه كذا مرة لانه غالبا بيكون معصلج وهو دة اساساً سبب العطل – لانه مفتاح لغلق وفتح الغاز – فلو عصلج ومتحركش الغاز مش حيوصل وبالتالى الشعلات مش حتولع والماء مش حيسخن – مجرد الضغط على العمود او المكبس دة كذا مرة حيرجع يشتغل تانى

رجع العلبة تانى فى مكانها واربطها بالمسمارين ووصل السلكتين اللى فكيتهم بال 2 سوكت بتوعهم – وجرب تفتح الحنفية السخنة دلوقتى – ان شاء الله حتلاقيه اشتغل – ركب بقى السخان وكافئ نفسك بأحلى كباية شاى

كدة توفر الفلوس اللى كنت حتدفعها للصيانة – لانهم بياخدوا 65 جنيه مصاريف انتقال وحيقولولك السولينويد محتاج يتغير وثمنه 250 جنيه – ومش حتعرف حيركب لك واحد جديد وللا مفكوك من عميل تانى الله اعلم – فبدل كل دة صلحة بنفسك ووفر فلوسك واشرب شايك تمام التمام

الفيديو دة فيه مهندس بيشرح على سخان شبه سخان ايديال – بس الفرق انه يمين بينما سخان ايديال شمال – لكن السولينويد هو هو ونفس شكله ونفس حجمه ونفس طريقة فكة وتركيبه

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *