فرخة محشية مشوية فى الفرن

<span>Whole frozen chicken without giblets</span>وجدت فى مجمعات “فاميلى ماركت” فراخ كبيرة جدا لم اراها من قبل – وزن الفرخة 2000جم – ماركة اوكرانى اسمها كواليكو Qualiko (طلعت شركة مشهورة وبتنتج كل حاجة بنفسها – مراعى خضراء ومصنع انتاج غذاءهم ومعامل تفريخ الكتاكيت وكل شئ شوف الفيديو دة)

المهم انى لما لقيت الفرخة قريبة من حجم الديك الرومى جت لى فكرة انى اشويها زى ما الامريكان بيشووا ديك الكريسماس – بس اضفت اللمسة الشرقية بتاعتنا – والنتيجة طلعت تحفة بجد – لازم تجربوها – مناسبة جدا للعزومات وحتزين السفرة – او يوم الجمعة مع اللمة – او تتاكل على يومين لو لوحدكو

السر الوصفة دى فى حاجتين – ان الفرخة تبات محشية ملح وبصل وخل فيطرى لحم الفرخة – وانها تستوى بطريقة الطهى البطئ: 3 ساعات فى فرن 140 درجة (بدلا من ساعة فى فرن حامى يحرقها من الخارج وتفضل نية فى الداخل)

المقادير

  • فرخة مجمدة 2000جم
  • 4 بصلات كبار
  • 2 فلفل رومى
  • معلقة ونصف صغيرة ملح
  • معلقة صغيرة فلفل اسود
  • معلقة صغيرة كبابة صينى او بهارات
  • نصف معلقة صغيرة قرفة
  • 3 معلقة كبيرة خل
  • 2 كيلو كوسة (او بطاطس+بصل+حلقات طماطم)
  • 2 كوب ماء فى حالة الكوسة (5 اكواب فى حالة البطاطس)

خلطة الدهان (اختيارى)

  • معلقة كبيرة سمن بلدى
  • معلقة كبيرة خل
  • معلقة صغيرة صلصة
  • ملح وفلفل وبهارات وذرة قرفة

الطريقة

  • نفك الفرخة من التجمد بوضعها فى ماء
  • فى الوقت دة نحضر الحشو بوضع كل المكونات فى الخلاط ونضربهم خفيف – عايزين البصل فتافيت لكن مش عصير طبعا
  • بعد ما الفرخة تفك نبدأ تدخل صباعين من ايدنا بالراحة تحت الجلد وشوية بشوية نتوغل فى منطقة الصدر من الامام ثم الوراك ثم ظهر الفرخة – بس بشويش خالص عشان ما نخرمش الجلد  عايزينه صحيح عشان يحتفظ بالحشو
  • نبدأ نحشى الفرخة بالخلطة بتاعتنا فى كل الاماكن اللى فتحناها – برضه بالراحة عشان منقطعش الجلد – وباقى الخلطة نحطها فى تجويف الفرخة الداخلى
  • ناخد معلقة صغيرة ملح نرشها على الفرخة من الامام والخلف وندعك الملح بادينا على الجلد كله وتحت الوراك والاجنحة
  • نضع شبكة فوق صينية ثم نضع الفرخة على الشبكة وندخلهم فى الثلاجة 24 ساعة (يعنى نعمل الخطوات السابقة فى اليوم السابق ليوم الشوى)
  • فى اليوم التالى نخرج صينية الفرخة من الثلاجة لتهدأ
  • نرفع الشبكة وعليها الفرخة – حنلاقى سائل فى قعر الصينية نسيبه ونحط معاه حلقات كوسة – جزر – بطاطس – طماطم – بصل – فلفل رومى او تشكيلة حسب الرغبة – ونصف كوب ماء
  • نعيد الشبكة وعليها الفرخة فوق الصينية
  • ندهن اذا اردنا وش الفرخة بخلطة الدهان باستخدام فرشة سليكون (خطوة اختيارية – ممكن من غير دهان)
  • ندخلها الفرن على 140 درجة لمدة ساعة ونصف
  • نخرج الصينية وننقل الشبكة بالفرخة على صينية اخرى فاضية
  • نصب كوب ماء على الخضار ونقلبه من تحت لفوق – حنلاقيه اخذ لسعة شوى لذيذة – عشان كدة دلوقتى ضرورى نزود كوب ماء عشان مايتحرقش فى الساعة الثانية
  •  نعيد الشبكة بالفرخة على صينية الخضار مرة اخرى – ونقلب الفرخة على ظهرها وندهنها بالخلطة – ونصب البهريز اللى نقط فى الصينية الفاضية على الفرخة – ثم ندخلها الفرن ساعة ونصف اخرى
  • نخرج الصينية من الفرن على السفرة على طول – وسّع وسّع – أحلى شيف فى الدنيا داخل بأحلى فرخة مشوية محشية لأحلى ناس – بس حاسبوا على صوابعكوا لتاكلوها وراها
  • لو الفرخة اللى معانا وزنها 1200جم نسويها فى الفرن على 140 درجة برضه لكن لمدة ساعتين ونصف (ساعة وربع لكل وش)
  • لو الفرخة اللى معانا وزنها 1000جم نسويها فى الفرن على 140 درجة برضه لكن لمدة ساعتين (ساعة لكل وش)

وبالف هنا وشفا

6 تعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *