تقييم موبايل مايكروسوفت لوميا 550

الموبايل دة سعره لا يدل على امكانياته ابداً – فأنت تتوقع من جهاز ثمنه 599ج انه يكون متواضع فى امكانياته – لكن المفاجأة انه جهاز قوى جدا ورائع – كاميرا تصويرها تحفة سواءا صور ثابتة او فيديو – فى مستوى ايفون 6 او جلاكسى اس4 – سريع جدا بالرغم من ان راماته 1 جيجا فقط – والسر يكمن فى نظام التشغيل الخفيف اللى تحس معاه كإن موبايلك 3 جيجا !

الجهاز دة انتاج مايكروسوفت يعنى جهاز قيم لانها شركة عريقة – وبالفعل الموبايل مكوناته درجة اولى – صوت نقى عالى – سماعات قوية – شاشة عالية الوضوح – كاميرا ممتازة – هو صحيح مش اندرويد طبعا – هو ويندوز 10 موبايل – ويمكن دة السبب اللى خللى مايكروسوفت تعمل الجهاز رخيص كدة عشان نظام تشغليها ينتشر

انا اكتشفت ان ويندوز 10 موبايل احسن واسرع بكتير جدا من اندرويد – الجهاز سلس زى مايكون ايفون والتتش بتاعه هايل ومتصفه ايدج الجديد من مياكروسوفت خفيف زى الريشة وسريع جدا بعكس جوجل كروم وفايرفوكس البطيئين جدا فى موبايلات اندرويد

نسيت اقول لكم ان الموبايل دة 4G يعنى جاهز للجيل الجديد من قبل مايشتغل فى مصر

لكن الجهاز فيه عيبين تلاتة كدة :

  • السماعة بتاعته فى مكان غبى جدا – لو حطيت الموبايل على جسم مسطح ناعم – ترابيزة او مكتب مثلا – الصوت يتكتم ويكاد لا يسمع – لازم تحط الموبايل مايل او مقلوب عشان تتفادى العيب الغبى دة – مش قادر اصدق انهم يقعوا فى العيب الهايف دة
  • الكاميرا تصويرها زبالة فى الضوء الضعيف قوى لو بدون فلاش بالرغم من ان تصويرها هايل فى الاضاءة النهارية او القوية

دى مقارنة ما بين كاميرا لوميا 550 واى فون 6 – لاحظوا ان صور لوميا زى ان ما كانتش احسن من صور الاى فون – ماعدا عند التصوير فى ضوء ضعيف زى ما قلت لكم

نظام ويندوز لو انت متعود على اندرويد طبعا حيضايقك شوية فى الاول – الموبايل بيسمح لك انك تدخل حسابك فى جوجل – لكن بس عشان يدمج ايميلاتك فى برنامج اوتلوك بتاع مايكروسوفت – اما باقى الخدمات فكلها من مايكروسوفت – رفع الصور والملفات على OneDrive اللى بيديك 30 جيجا مساحة تخزينية مجانية – وكمان الموبايل عليه برامج اوفس: ورد واكسيل واكسس وباور بوينت

وطبعا بدل جوجل بلاى ستور حتستخدم ويندوز ستور – حتلاقى معظم التطبيقات الشهيرة زى وتساب وايمو وتويتر والالعاب الشهيرة – دة غير ان الموبايل حتلاقى عليه جاهز فيسبوك وسكايب والخرائط وشيزام والاخباروتطبيقات كتير مفيدة

الموبايل فيه ميزة جميلة وهى اظهار الساعة والتاريخ دايما على الشاشة السوداء بعد ما تتركه بدون استخدام – زى الموبايلات الفخمة

وزن الموبايل 140جم – نفس وزن سامسونج جلاكسى اس4

المكالمات واضحة وصوتها عالى

لوحة المفاتيح جميلة جدا وبدون اخطاء بالرغم من ان حجم الشاشة مش كبير: 4.7 بوصة

متصفح الانترنت الجديد Microsoft Edge ممتاز وسريع جدا

استقبال الواى فاى الوايرليس ممتاز فى الاماكن البعيدة عن الراوتر مقارنةً باجهزة كتير اخرى

الالعاب بتشتغل عليه سريعة والصورة مش بتقطع – جربت عليه اسفلت 8 اشتغلت بدون أى مشاكل

دى مقارنة بين لوميا 550 واى فون 6 فى لعبة تمبل رن

أخيرا ممكن للى عايز موبايل اقتصادى فى سعره انه يقدر يحصل على موبايل ممتاز بالرغم سعره المتواضع

مواصفات الموبايل بالتفصيل

صفحة الموبايل على موقع مايكروسوفت

شفت مفاجأة النهاردة ؟ اضغط هنا عشان تشوفها (مفاجأة جديدة كل يوم)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *