عيش بلدى على البوتاجاز فى ربع ساعة

اليكم أسرع وأسهل طريقة شفتها فى حياتى لعمل عيش فى البيت – حنعمل مع بعض عيش بلدى أسمر فى البيت على البوتاجاز – بدون حاجة للفرن – وهى نفس طريقة خبز فى الهند يسمونه phulka فولكا او شباتى او روتى – يصنع بدون خميرة وبدون تخمير – يحتوى على دقيق اسمر وماء وملح فقط – بصراحة انا كنت مش مصدق اننا ممكن نعمل عيش من غير خميرة ولا وقت طويل للتخمير – لغاية ما جربت بنفسى وذهلت لما شفت العيش بيتنفخ فى ثوانى زى البالونة على النار – وعرفت ان السبب هو ضغط البخار المتصاعد داخل الرغيف وان الضغط دة بسبب الحرارة العالية للنار المباشرة هو اللى بينفخ الرغيف زى البالونة

يتميز العيش دة بانه رقيق جدا – الرغيف وزنه 23جم فقط (الرغيف العادى من الفرن بيبقى وزنه من 85 الى 130جم) وبكدة حنقدر ناكل عيش اقل عشان محبى الرشاقة واللى عايز يحافظ على وزنه – وهو مناسب جدا للى بيعمل ريجيم لان سعراته اقل من سعرات العيش السن – وكمان ميزته انه سريع جدا فى تحضيره – فلا وقت للعجن مدة طويلة ولا للتخمير – فى خلال نص ساعة فقط نقدر نعمل 8 او 16 رغيف – ودة يخلينا ممكن نعمله طازة كل يوم ولا نحتاج لوضعه فى الثلاجة – لكن لو وقتنا ضيق طبعا ممكن نعمل كمية اكبر ونشيله فى اكياس فى الثلاجة عادى – كمان من مزاياه انه عيش صحى جدا لانه مصنوع من دقيق حبة القمح الكاملة بكل ما تحتويه من عناصر غذائية مفيدة – ولو ملقيناش دقيق حبة القمح الكاملة ممكن نخلط 15جم ردة ناعمة مع 85جم دقيق ابيض لنحصل على 100جم دقيق اسمر – ومن المزايا الخطيرة للعيش دة اننا ممكن نعمله رقاق – كما سأوضح لكم – بمنتهى السهولة وبدون أى خطوات اضافية

تجربتى لعمل عيش بلدى رقيق

المقادير (لعمل 8 ارغفة قطر 15سم وزن 23جم)

  • 150جم دقيق حبة القمح الكاملة (من انتاج مطاحن شمال القاهرة)
  • 100جم ماء دافئ
  • ربع م ص ملح
  • طبق به ردة (لاستخدامه خلال فرد اقراص الخبز)

الطريقة

نقلب الملح مع الدقيق ثم نصب الماء ونخلطهم كويس ونعجنهم دقيقتين ثم نغطيهم ربع ساعة
نقطع العجينة 8 اجزاء ونشكلهم كور
نغمر كرة فى طبق ردة ونفردها بالنشابة مع غمسها فى الردة كل شوية عشان ماتلزقش
نفرد لغاية مايبقى القرص قطره حوالى 15سم
نرص الاقراص فوق بعض على صينية
نضع شواية على نار متوسطة ونضع عليها قرص
بعد 5 ثوانى نقلبه على وجهه الثانى ونسيبه لغاية ما نلاقى بقع بنى
نضعه على وجهه الاول على نار مباشرة ضعيفة ثوانى حتى تعلو
نقلبه على الوجة الثانى ثوانى ايضا
لو عايزين العيش طرى للسندوتشات او الغموس ناخده من على النار نحطهم على طول فوق بعض فى حلة او طبق غويط  – اما لو بنحبه مقرمش نتركه فى الهواء وبعد مايبرد خالص نغطيه بفوطة – ودة مش محتاج يتشال فى الثلاجة – وعلى فكرة المقرمش ممكن نستخدمه رقاق نعمل بيه صوانى رقاق تحفة

kneading roti dough

نعجن الدقيق والملح والماء ونغطيهم ربع ساعة

 

dough balls for making rotis or phulkas

نقسم العجينة ونسكل كور بحجم البيضة

 

rolling rotis

نفرد الكرة بالنشابة

 

rolling dough for making rotis or dough

حتى نحصل على قرص مستدير قطره حوالى 15سم

 

making rotis or phulkas

نضع القرص فى طاسة سابقة التسخين على نار متوسطة

 

making rotis or phulkas

بعد 5 ثوانى نقلب القرص على الوجه الثانى ونتركه حوالى نصف دقيقة حتى تظهر فى القعر بقع بنى صغيرة

 

puffed rotis or phulkas

نأخذ الرغيف من الطاسة ونضعه على نار متوسطة مباشرة على وجهه الاول – فى ثوانى الرغيف حيتنفخ – نقلبه على وشه الثانى ثوانى اخرى مش اكتر عشان مايتحرقش

شفت مفاجأة النهاردة ؟ اضغط هنا عشان تشوفها (مفاجأة جديدة كل يوم)

2 تعليقان

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *