عيش شامى فى 10 دقائق

shamyحنعمل مع بعض العيش الشامى بطعم الفطير

ميزته انه عيش عملى جدا وطعمه يشبه طعم الفطير وبيبقى خطير فى سندوتشات الفول والطعمية لكن كمان يصلح لأى نوع من السندوتشات فى البيت – هنا حنعمله بنفس طريقة عمل العيش الشباتى او “روتى” الهندى – الكمية التالية تكفى لعمل 10 ارغفة وزن 90-100جم – بدون خميرة والعجينة بتبقى جاهزة فى نصف ساعة فقط!

دى ثالث تجربة لى لعمل العيش الشامى – وطبعا كالعادة اوعدكم انى اعدل المقادير والخطوات مع تكرار تنفيذى للوصفة كل مالاقى انها محتاجة تتعدل

المقادير

  • 750جم دقيق ابيض
  • 375جم ماء
  • 2 معلقة صغيرة ملح (20جم)
  • معلقة زيت

الطريقة

  • نقلب نصف الدقيق مع كل الماء كويس جدا ثم نضيف بالتدريج باقى الدقيق ونعجنهم دقيقة ونصب معلقة زيت على العجينة عشان ما تلزقش ونعجن دقيقة كمان فى طبق ونقلبها فيه ثم نغطيها 10 دقائق
  • نقسم العجينة 10 اجزاء – لو عاوزينه متساوى نقسم العجينة نصفين وكل نصف نقسمه 5 اجزاء – كدة يبقى عندنا 10 قطع متساوية – نحطهم فى كيس بلاستيك عشان ما ينشفوش
  • نحضر دقيق فيه طبق
  • نغمس كرة عجين فى الدقيق ونبدأ نفردها بالنشابة على شكل قرص مستدير رفيع السمك – نفرد مرة بالطول وبعدين نقلبها ونفرد بالعرض ونكرر حتى نصل لقطر 20-25سم تقريبا (نفرد العجينة على قد مانقدر – كل ما تبقى ارفع حنستهلك عيش اقل فى السندوتشات) ونغمسها فى طبق الدقيق تانى لو لقيناها بدأت تلزق
  • نفرد كل الاقراص ونضعهم بجوار بعض فى صينية ونغطيها
  • نسخن طاسة او شواية حديد على نار متوسطة
  • نضع قرص فى الطاسة وننتظر حوالى 15 ثانية
  • نقلبه على وجهه الثانى
  • اذا لاحظنا قعر الخبز بيسود بسرعة نقلل مستوى النار
  • بعد حوالى 15 ثانية لما نلاحظ ظهور بقع بنى خفيف فى القعر نقلب القرص ونمسك فوطة وبر نكورها فى ايدنا او سباتيولا ونضغط بيها خفيف على جوانب القرص ونلفه فى نفس الوقت – ونستمر فى الضغط الخفيف مع تدوير القرص لغاية ما القرص يبدأ يتنفخ
  • نقلبه على وشه الثانى ونضغط برضه خفيف لغاية ما يتنفخ كويس
  • ننقله على شبكة تهوية او فوطة لمدة دقيقة – وبعدين نحطه فى كيس عشان يبقى طرى
  • نضع القرص التالى ونكرر نفس الخطوات

الفيديو التالى لطريقة عمل خبز الشاباتى او الروتى الهندى – مختلف بس فى المثادير – لكن حناخد منه بس الخطوات

 

وبالهنا والشفا

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *