سمك مكريل مشوى فى البيت

مش لازم تشترى سمك الماكريل مشوى جاهز – لان شويه فى البيت سهل جدا وموفر وكمان يخلينا نقدر نعمله فى أى وقت – بس نشترى سمك مكريل نى ونشيله فى الفريزر

الطريقة من أسهل ما يكون – سمك المكريل يتميز بانه لا يحتاج تنظيف وكمان طعمه مضبوط لا يحتاج أى اضافات – لا ملح ولا توابل ولا خضروات ولا ردة – صدقونى احلى طعم وهو مشوى ناتوريل طبيعى – أى اضافات تنتقص من طعامته هو نفسه

نغسل السمك بالماء فقط ثم نرصه فى صينية فرن زى ما هو بدون فتح بطنه ولا أى حاجة – ونشعل الشواية اللى موجودة أعلى سقف الفرن – وفى الوقت دة نحط الصينية على نار عالية على البوتاجاز لمدة 5 دقائق عشان نسوى السمك من تحت شوية ونسخن قعر الصينية – ثم نضعها فى الرف الاوسط تحت الشواية ونقفل باب الفرن ونتركه 15 دقيقة

بعد اخراج الصينية حنلاقى وش السمك نشف شوية لكن من ظهره طرى عشان السوائل اللى نزلت فى الصينية –  فنقلبه على الناحية التانية عشان السوائل تطريها هى كمان ويبقى سهل فى نزع قشره عند تناوله

عند الاكل نقشر السمك من الناحيتين ثم نشقه طوليا من بطنه – وننظفه بطرف السكينة وننزع السلسلة

يؤكل كما هو بدون اضافة ملح ولا أى توابل – فلحمه مضبوط ولا يحتاج أى شئ – يقدم مع أرز ابيض مطهى على البخار (او مسلوق)

وعلى فكره طعم المكريل بيبقى أحلى لما يبرد – وكمان اسهل فى تنظيفه – ساعتها بيشبه طعم التونة اللذيذ

وبالهنا والشفا

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *