طريقة عمل الكشك اللذيذ

الكشك من الذ الاطباق وأسهلها – جربوه وان شاء الله حيعجب كل افراد الاسرة – حنعمله هنا بالطريقى التقليدية القديمة – اللى بتعتمد فى طعامتها على خميرة الكشك – وهى ببساطة خليط دقيق وزبادى يترك ساعات او ليلة ليتخمر – ليعطى طعم أشبه بطعم الكشك الصعيدى الأصلى – الذى يعتمد على كرات الكشك المجفف – حيث ينقعون القمح صحيح فى لبن رايب بضعة أيام حتى يتشرب جيدا ثم يعملوه كور ويتركوه يجف تماما ثم يخزنوه طول السنة

المقادير

  • 80جم دقيق (4 معالق كبيرة) (8% من وزن السوائل)
  • كيلو سوائل عبارة عن :
    • 200جم لبن رايب او زبادى حنط (مرت عليه بضعة أيام عشان يبقى مزز) او ربع كوب خل وباقى الكوب حليب
    • 800جم مرقة فراخ او لحم (لو الشوربة اكثر تزود الدقيق – المهم يكون الدقيق 8% من وزن الشوربة والزبادى)
  • بصلة
  • 2 معلقة كبيرة سمن او زبدة
  • نصف معلقة صغيرة كبابة صينى

الطريقة

  • نقلب الدقيق مع الزبادى بمضرب سلك حتى يختلطوا تماماً ثم نغطيهم 3 ساعات او اكثر على المطبخ
  • نسخن الشوربة على النار
  • نضع قليل من الشوربة على خليط الدقيق والزبادى ونقلب
  • نصب الخليط بالتدريج على الشوربة مع التقليب بالمضرب السلك على نار هادية
  • نخرط البصلة رفيع ثم نحمرها فى السمن حتى يصبح لونها بنى
  • نصفى السمن على الكشك فى الحلة ونقلبهم كويس ونتركهم على نار هادية بضع دقائق حتى يغلظ قوامه
  • نقلب البصل على النار حتى يصبح مقرمش ونقلبه مع الكشك فى الحلة – او نترك نصف البصل لتزيين الاطباق
  • نصب الكشك فى اطباق ونجمله برش البصل المحمر عليه
  • يقدم دافئاً
  • لو عاملين كمية حيفيض منها لبكرة لا داعى لصبها كلها فى اطباق ونزحم الدنيا – الاحسن نسيبها فى الحلة وفى اليوم التالى نسخنها قبل ما نصبها فى اطباق عشان الكشك يبقى دافى مش ساقع وهو بيتقدم

وبالف هنا وشفا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *