مقارنة تحمير البطاطس فى تيفال اكتيفراى وفى الزيت

انا فكرت اشترى ماكينة تحمير تيفال اكتيفراى – لكن عشان ثمنها غالى جدا – 1399ج – قلت اجربها الاول – فاستلفناها من صديقة للاسرة – وجربت فيها تحمير البطاطس عشان اقارن بين طعم البطاطس المحمرة بالطريقة العادية فى الزيت وبين طعمها لما تتحمر فى ماكينة تيفال اكتيفراى – واليكم النتائج
ACTIFRY

أولا الماكينة بتاخد وقت طويل جدا فى التحمير – فبعد 20 دقيقة لقيت البطاطس لسة نية – وبعد 30 دقيقة كان لونها فاتح خالص – انتظرت حتى 40 دقيقة كانت استوت كويس بس برضه لونها فاتح مش دهبى زى اللى متعودين عليه

ثانيا قلب البطاطس تحس انه مسلوق شوية – هى من برة طعمها بطاطس محمرة – لكن من جوة تحسها مسلوقة شوية وخصوصا لو صوابع تخينة شوية – مع انى قطعتها رفيع خالص

دة طبيعى وكنت متوقعه – والسبب ان البطاطس المحمرة فى الزيت بتكون مغمورة تحت الزيت كلها وبالتالى الزيت الساخن بيتغلغل فى قلب البطاطس ويحمرها من جوة ومن برة – اما فى ماكينة تيفال عشان بنستخدم معلقة زيت واحدة فبالبطاطس بتكون يادوبها مطلية من برة بطبقة زيت خفيفة جدا لا تصل بالطبع لقلب البطاطساية – وبالتالى بتتحمر من برة لكن من جوة لا يصل اليها الزيت فلا تتحمر

ثالثا كلامهم بان التحمير بيكون فى معلثة زيت واحدة كلام مخادع – لان المعلقة اللى جاية مع الجهاز معلقة ضخمة تعادل معلقتين كبار زيت – وزنهم 30جم – وكمان طعم البطاطس مش خفيفة ولا حاجة – طعم الزيت باين فيها جدا زيها زى المتحمرة عادى فى الزيت

كل اللى داقوها قالوا ان البطاطس المحمرة فى الزيت أحلى

دة غير ان ماكينة تيفال اكتيفراى مش بس بتستهلك وقت طويل جدا – 40 دقيقة لتحمير 700جم – يعنى لو عيلة من 5 افراد مثلا تحتاج ساعتين لتحمير 2 كيلو بطاطس! لأ وكمان استهلاكها من الكهرباء رهيب – 1400 وات – دة اكثر من السخان الكهرباء والتكييف

لذلك الخلاصة هى اننى انصحكم بعدم شراء ماكينة تيفال اكتيفراى – لان التحمير فى الزيت يكسب من كل النواحى

نصائح هامة

وبمناسبة التحمير فى الزيت – اليكم بعض النصائح لتقليل نسبة الزيت فى البطاطس المحمرة عادى فى الزيت

  • يجب تسخين الزيت كويس – ما بين 180 – 190 درجة مئوية – لو وضعنا البطاطس فى زيت لم يسخن كويس حيمتص زيت أكثر – لذلك يجب الانتظار حتى يسخن تماما
  • لا يجب وضع كمية بطاطس كبيرة – لان دة حيخلى الزيت يبرد وبالتالى البطاطس حتمتص زيت اكثر وكمان حتاخد وقت اطول – الافضل تقسيم البطاطس الى كميات قليلة وتحمير كل منها لوحدها – كدة حتسوى اسرع وتمتص زيت أقل
  • يجب استخدام مصفاة لتصفية البطاطس كويس جدا بعد تحميرها – انا بأجهز حلة وفوقها مصفة معدن – واصب البطاطس بعد ما تتحمر ومعاها زيت التحمير – واخبط الصفاية اكثر من مرة بقوة لغاية ما الزيت كله يتصفى فى الحلة – بعد كدة اعيد صب الزيت فى طاسة او حلة التحمير مرة أخرى – لكن من خلال مصفاة صغيرة دقيقة جدا (مصفاة الشاى المعدن) حتى تحجز أى فتافيت بحيث يبقى الزيت متصفى تماما وخالى من أى فتافيت
  • تصفية الزيت بعد كل مرة مهم جدا عشان نتخلص من أى فتافيت من بقايا التحمير السابق – لان تلك البقايا لو تركناها فى الزيت لما يسخن حتتحرق وتسود – ودة اللى بيخللى الزيت يبقى لونه غامق ونتخلص منه – اما لو صفينا الزيت بعد كل مرة حيفضل لونه فاتح جميل ونقدر نحمر بيه مرات أكثر – وخصوصا بعد ما اسعار الزيت بقت نار
  • فى كل مرة نحمر كمية أخرى لازم ننتظر حتى يسخن الزيت تماما قبل وضع البطاطس

One Comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *