ملوخية وفراخ مشوية

كلنا بنحب الفراخ المشوية – لكن المشكلة ان الفرخة وهى بتتشوى بينزل منها كل البهريز اللذيذ بتاعها وبيتحرق – عشان كدة عندى لكم طريقة تخلينا نستفيد من بهريز الفرخة

تحديث: كتبت لكم طريقة احسن هنا

  • أول حاجة حنقطع الفرخة 4 اربع وكمان نفصل الاجنحة – وبعدين نحطهم فى حلة – ونضرب فى الخلاط بصلة وطماطماية وفلفلاية رومى وقرن فلفل حامى و3 معالق كبيرة خل ونصبهم فوق قطع الفراخ ونغطى الحلة على نار هادية جداً مثل الشمعة لمدة ساعتيين
  • بعد كدة ناخذ قطع الفراخ ونصفيها من البهريز بتاعها ونحطها فى صينية فرن
  • البهريز نعمل بيه ملوخية
  • نتبل قطع الفراخ من الوجهين بالخلطة التالية بعد تقليبها جيداً:
    • معلقة صغيرة كركم
    • معلقة صغيرة كبابة صينى او بهارات
    • معلقة كبيرة زعتر
    • حزمة كزبرة خضراء مفرية او معلقة كبيرة كزبرة ناشفة بودرة
    • معلقتين كبار خل
    • معلقتينصغيرين سمن بلدى
  • نحط صوابعنا تحت جلد الفرخة وندهن لحمها بالتتبيلة تحت جلد الصدر والظهر والوراك – ثم ندهنها كلها من الخارج والداخل
  • نرص قطع الفراخ فى الصينية ونضعها تحت شواية البوتاجاز على الرف الاوسط حتى تحمر – حوالى 10 دقائق – ثم نقلبها على الوجه الاخر حتى يحمر – حوالى 5 دقائق

وبالف هنا وشفا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *