اسرع طريقة لانضاج الموز

ساعات بنكون نفسنا ناكل موز لكن نلاقى الموز المتوفر أخضر او اصفر بس لسه ما استواش – والمعروف ان احلى طعم للموز هو لما القشرة تبدأ تغمق وتبقى لونها بنى – ساعتها بيبقى الموز معسل وقشرته بتبقى رقيقة جدا (القشرة السميكة تحول اغلبها الى لحم موز) – ودة مش بيحصل الا لو تركنا الموز يستوى اسبوع او اكثر

عندى لكم طريقة تقدروا بيها تخلوا الموز يستوى فى خلال 3ساعات فقط

  • نشعل فرن البوتاجاز على أقل درجة حرارة – ناس كتير متعرفش اننا نقدر نخلى الفرن دافى مش اكتر – الطريقة سهلة – بعد اشعال الفرن : نضبط المؤشر على أقل درجة وبعدين نبدأ نحرك المؤشر فى اتجاه الاغلاق لكن ببطء شديد حتى لا تنطفى نار الشعلات – ونكون فاتحين الباب السفلى عشان نراقب مستوى الشعلة – ونستمر فى تخفيض النار لأقل درجة ممكنة – اللى هيا لو قللنا عنها شعرة كمان الشعلة تنطفى – بكدة الفرن حيفضل دافى بس ومش حيوصل لدرجة السخونة
  • نلف الموز كويس فى ورق جرايد – 3 ورقات فوق بعض
  • نضع طبق معدن واسع او طاسة فى قعر الفرن فوق مكان فتحة الاشعال ونملاه ماء
  • نضع الموز على الرف الاوسط ونغلق باب الفرن

بعد ساعة نطفى النار بدون فتح باب الفرن – نترك الموز فى الفرن ساعتين كمان داخل الفرن المطفى وبابه مغلق – سنجد بعدهم ان الموز قشرته بقت لونها بنى ومستوى وجاهز للأكل

(الطريقة دى انا جربتها مع الموز الاصفر او اللى بدا يصفر – لكن مجربتهاش لو الموز اخضر خالص – اعتقد لازم نسيبه كام يوم لغاية ما يبدا يصفر الاول قبل ما نطبق علية طريقة الفرن)

الطريقة دى بتعتمد على 3 حاجات:

  • اولا الموز بيستوى أسرع كلما كانت درجة الحرارة أدفأ
  • ثانيا قشر الموز بيخرج منه غاز الاثيلين وهو الهرمون اللى بيخلى الموز ينضج – عشان كدة لف الموز فى ورق بيحبس غاز الاثيلين عشان ميطيرش بعيد عن الموز فيستوى اسرع
  • ثالثا الرطوبة تسرع من انضاج الموز ولذلك وضعنا طبق ماء فى قعر الفرن

وبالف هنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *