طريقة تخليل الخيار ملح خفيف

كل الناس بتحب الخيار المخلل – لكن الجاهز بيبقى معمول بملح كتير جدا عشان يحفظه – وياريته ملح كويس – دول بيستخدموا ارخص الانواع للأسف

عندى لكم طريقة تخليل بيتى نظيفة وصحية بملح أقل 3 مرات من المخلل الجاهز – لان كثرة الملح يضر بالصحة وخصوصا لمرضى الضغط – انا شخصيا باعمله لاسرتى بصفة دائمة فى البيت والكل بيحبه مع الفطار والغدا والعشا – مش محتاجين برطمانات تخليل لان طريقتى سهلة جدا وحتديكى خيار مخلل مقرمش – حنخلل الخيار إما فى حلة – لو بناكل منه كتير – او فى اكياس بلاستيك – طريقة الاكياس ميزتها انها محكمة وبالتالى لايدخلها الهواء اللى بيسبب تلف المخللات ويخليها طرية وتكون ريم على الوش – وكمان اسهل فى الحفظ مباشرةً فى الثلاجة بمجرد مايتم التخليل بدون ما نحتاج ننقله من البرطمان لاكياس الثلاجة

المقادير

  • 2 كيلو خيار تخليل صغير طازج وناشف
  • لتحضير ماء التخليل:
    • 3 لتر ماء
    • 250جم خل (كوب 250جم)
    • 90جم ملح (لعمل محلول ملحى بنسبة 3%)
    • بعض قرون فلفل حامى او معلقة صغيرة شطة (اختيارى لمن يحب الشطة)
    • معلقة كبيرة ثوم مهروس
    • فلفلاية رومى كبيرة او 2 صغير

الطريقة

  • نغسل الخيار جيدا مع نزع الورد البرتقالى من بوز الخيار المدبب
  • نترك الخيار فى صفاية حتى يجف ثم نضعه فى حلة كبيرة
  • فى حلة أخرى نغلى الماء مع الخل والملح والشطة
  • نصب الماء المغلى على  الخيار
  • بعد شوية نقلب الخيار بمعلقة كبيرة بحيث اللى فوق ينزل تحت
  • بعد مايبرد نضيف الثوم ونقلبه فى ماء الخيار
  • نغطى حلة الخيار وبعد ساعة يكون جاهز للأكل
  • ممكن نسيبه فى الحلة وناخد منه كل يوم لو بيخلص فى اسبوع مثلا
  • اما لو بناكل منه قليل وحيقعد اسابيع يبقى نشيله فى اكياس فى الثلاجة:
    • نحكم غلق كل كيس بعد طرد الهواء منه وذلك بدفع بعض من ماء التخليل لأعلى الكيس اثناء لفه حتى لا نترك فرصة لتسلل أى هواء لداخل الكيس
IMG_1568

لون الخيار قليل من وضعه فى ماء التخليل الساخن – سنلاحظ الفرق بين لون الخيار الطازج وبين لون الخيار بعد ساعة

ياريت تعلموا خيار مخلل دايما فى البيت – الاطفال بيحبوه دايما – فهو مفيد ليهم خصوصا لو مالهومش فى السلطة – كدة حياكلوا خضروات بطعم بيحبوه يمشى مع كل الاكلات والسندوتشات طوال اليوم

حافظوا على صحتكم بتجنب شراء المخلل الجاهز واعملوه فى البيت بملح خفيف ومكونات نظيفة ومضمونة –

وبالف هنا وشفا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *